અંબાજી મંદિરમાં મોહનથાળનો કોન્ટ્રાક્ટ જે નવી કંપનીને અપાયો, એ પણ પહેલા આવી ચૂકી છે વિવાદમાં
Ambaji News: સુપ્રસિદ્ધ યાત્રાધામ અંબાજી મંદિરમાં મોહનથાળનો પ્રસાદ તૈયાર કરવા માટે હવે ટચ સ્ટોન ફાઉન્ડેશનને કોન્ટ્રાક્ટ અપાયો છે. મોહિની કેટરર્સનુ ટેન્ડર રદ કરાયા બાદ ટચ સ્ટોન ફાઉન્ડેશન દ્વારા પ્રસાદ બનાવવાની કામગીરીની શરૂઆત કરાઈ છે. મહત્વનું છે કે, જેને પ્રસાદનો નવો કોન્ટ્રાક્ટ અપાયો છે તે ટચ સ્ટોન ફાઉન્ડેશન પણ ભૂતકાળમાં વિવાદમાં સપડાઈ ચૂક્યું છે. ત્યારે તંત્ર દ્વારા આ કંપનીને ફરી કોન્ટ્રાક્ટ આપવામાં આવતા અનેક સવાલો ઉભા થયા છે.
ભેળસેળવાળુ ઘી ઉપયોગમાં લેવાતા વિવાદ
અંબાજી ખાતે યોજાયેલા ભાદરવી પૂર્ણિમાના મેળા દરમિયાન મોહનથાળના પ્રસાદને લઈને મોટો વિવાદ સર્જાયો હતો. મોહનથાળનો પ્રસાદ બનાવવા માટે શુદ્ધ ઘીના બદલે ભેળસેળ વાળુ ઘી ઉપયોગમાં લેવામાં આવતા વિવાદ સર્જાયો હતો. ભક્તોના આરોગ્ય સાથે ચેડાં કરીને મંદિરના પ્રસાદમાં ભેળસેળ કરવામાં આવતા માઈભક્તોમાં રોષ જોવા મળ્યો હતો.
કંપનીને કરાઈ હતી બ્લેકલિસ્ટ
જે બાદ આ મામલે વિવાદ વકરતા પોલીસ ફરિયાદ પણ દાખલ કરવામાં આવી હતી અને મોહનથાળનો પ્રસાદ બનાવનાર મોહિની કેટરર્સનું ટેન્ડર રદ કરવામાં આવ્યું હતું. મોહિની કેટરર્સને ઘીના ગોટાળા મામલે બ્લેક લિસ્ટ કરવામાં આવી હતી.
અગાઉ વિવાદમાં આવી ચૂક્યું છે ફાઉન્ડેશન
જે બાદ માઈભક્તો પ્રસાદથી વંચિત ન રહે એ માટે અંબાજી મંદિર દ્વારા જ મોહનથાળનો પ્રસાદ અત્યાર સુધી બનાવવામાં આવતો હતો. ત્યારે હવે મંદિર ટ્રસ્ટ દ્વારા ટચ સ્ટોન ફાઉન્ડેશનને પ્રસાદ બનાવવાનો કોન્સ્ટ્રાક્ટ આપવામાં આવ્યો છે. આ ટચ સ્ટોન ફાઉન્ડેશનનો ભૂતકાળ પણ વિવાદાસ્પદ જ રહ્યો છે.
નાયબ મામલતદારે ફટકાર્યો હતો દંડ
2015માં આ સંસ્થાને મોહનથાળની પ્રસાદીમાં ભેળસેળ કરતા નાયબ મામલતદાર દ્વારા રંગેહાથ ઝડપી લેવાઈ હતી. જે બાદ કંપનીને દંડ ફટકારવામાં આવ્યો હતો. ત્યારે ફરી આ કંપને કોન્ટ્રાક્ટ અપાયો છે.
