રાજકોટમાં BRTS બસનું ભાડું જાહેરાત વિના જ બે ગણું સુધી વધી ગયું, મુસાફરોની હાલત કફોડી

Rajkot News: રાજકોટવાસીઓ માટે ખરાબ સમાચાર સામે આવ્યા છે. BRTS બસમાં મુસાફરી કરવા માટે હવે લોકોએ બમણું ભાડું ચૂકવવું પડશે. રાજકોટ મહાનગરપાલિકાએ કોઈ જાહેરાત કર્યા વિના જ BRTSનું ભાડું દોઢથી ડબલ ગણા સુધી વધારી નાખ્યું છે. જેના કારણે સ્ટેશન પર પહોંચીને ટિકિટ લેતા જ મુસાફરોને ઝાટકો લાગ્યો હતો.

15ની ટિકિટ રાતો રોત 25ની થઈ ગઈ

ઝી 24 કલાકના અહેવા મુજબત, રાજકોટમાં માધાપર ચોકડીથી ગોંડલ ચોકડી સુધીના રૂટની મુસાફરીનું ભાડું વધારી દેવાયું છે. આ રૂટ પર પહેલા 15 રૂપિયા ભાડું હતું જે હવે વધારીને 25 રૂપિયા કરી દેવામાં આવ્યું છે. તો આવી જ રીટે ટૂંકા રૂટનું જે ભાડું 7 રૂપિયા હતું તેને પણ વધારીને 15 રૂપિયા કરી દેવામાં આવ્યું છે. અચાનક જ ભાડામાં આટલો તોતિંગ વધારો થતા વિદ્યાર્થીઓ, નોકરિયાત વર્ગ તથા અન્ય મુસાફરો પણ નારાજ જોવા મળી રહ્યા છે.

રીક્ષા કરતા બસનું ભાડું વધારે

ખાસ વાત એ છે કે માધાપર ચોકડીથી ગોંડલ ચોકડી સુધી ઓટોમાં જવા માટે 20 રૂપિયા ભાડું છે, જ્યારે BRTSમાં જવા માટે રૂ.25ની ટિકિટ લેવી પડશે. આ ભાવવધારા પાછળ વિચિત્ર કારણ આપવામાં આવી રહ્યું છે અને છુટા રૂપિયાની રોજ સમસ્યા થતી હોવાના કારણે તેને વધારી દેવાનું કહેવાયું છે, જે બહાનું મુસાફરોના ગળે ઉતરી રહ્યું નથી.