20 વર્ષ બાદ અમદાવાદમાં થશે કાંગારૂઓનો હિસાબ! 2003ની IND vs AUS વર્લ્ડકપ ફાઈનલમાં શું થયું હતું?

આ પહેલા 2003 વર્લ્ડ કપની ફાઈનલ મેચ ભારત અને ઓસ્ટ્રેલિયા વચ્ચે રમાઈ હતી. આ ટાઈટલ મેચ દક્ષિણ આફ્રિકાના જોહાનિસબર્ગમાં રમાઈ હતી, જેમાં ભારતીય ટીમને 125 રનથી હારનો સામનો કરવો પડ્યો હતો. તે સમયે ભારતીય ટીમની કમાન સૌરવ ગાંગુલીના હાથમાં હતી. રિકી પોન્ટિંગ કાંગારૂ ટીમની કેપ્ટનશીપ કરી રહ્યો હતો.

19 નવેમ્બરે અમદાવાદમાં ફાઈનલ

પરંતુ હવે 20 વર્ષ બાદ બંને ટીમો સંપૂર્ણપણે બદલાઈ ગઈ છે. હવે ભારતીય ટીમની કમાન રોહિત શર્માના હાથમાં છે. જ્યારે કાંગારૂ ટીમની કપ્તાની ઝડપી બોલર પેટ કમિન્સ સંભાળી રહ્યો છે. આ વખતે ટાઈટલ મેચ એટલે કે ફાઈનલ મેચ 19મી નવેમ્બરે અમદાવાદના નરેન્દ્ર મોદી સ્ટેડિયમમાં રમાશે.

The #CWC23 Finalists are confirmed 🙌🏻

India 🆚 Australia

🏟️ Narendra Modi Stadium, Ahmedabad 👌🏻#TeamIndia | #MenInBlue pic.twitter.com/QNFhLjbJZV

— BCCI (@BCCI) November 16, 2023

2003માં ભારતીય ટીમ આ રીતે હારી હતી

ગત વખતે 360 રનના ટાર્ગેટના જવાબમાં ભારતીય ટીમ 39.2 ઓવરમાં 234 રન પર જ સિમિત રહી હતી. વિરેન્દ્ર સેહવાગે સૌથી વધુ 82 રનની ઇનિંગ રમી હતી. સચિન તેંડુલકર (4), કેપ્ટન ગાંગુલી (24), મોહમ્મદ કૈફ (0), રાહુલ દ્રવિડ (47), યુવરાજ સિંહ (24) અને દિનેશ મોંગિયા (12) કંઈ ખાસ બતાવી શક્યા ન હતા.

2003માં ગાંગુલીની કેપ્ટન્સીમાં ‘દાદા’ગીરી ચાલી હતી. પરંતુ હવે 20 વર્ષ બાદ ઓસ્ટ્રેલિયા અને ભારતની આખી ટીમમાં ઘણો બદલાવ આવ્યો છે. આ વખતે રોહિત શર્માની કપ્તાની હેઠળની ભારતીય ટીમ કાંગારૂઓની સરખામણીમાં ઘણી મજબૂત દેખાઈ રહી છે. આ વખતે વર્લ્ડ કપમાં નવા ભારતની ‘દાદાગીરી’ જોવા મળી છે. આ જ કારણ છે કે ભારતીય ટીમ આ સિઝનમાં એક પણ મેચ હારી નથી.

આ વખતે રોહિતની કપ્તાનીમાં ‘દાદાગીરી’ ચાલુ રહેશે

ભારતીય ટીમે અત્યાર સુધી તેની તમામ 10 મેચ જીતી છે. બીજી તરફ ઓસ્ટ્રેલિયાએ અત્યાર સુધી તેની 10 મેચમાંથી 8માં જીત મેળવી છે. ભારતીય ટીમે પ્રથમ સેમિફાઇનલ રમી હતી, જેમાં તેણે છેલ્લી ઉપવિજેતા ન્યુઝીલેન્ડને 70 રનના માર્જીનથી હરાવ્યું હતું. જ્યારે કાંગારુ ટીમે બીજી સેમીફાઈનલમાં ચોકર્સ તરીકે ઓળખાતી દક્ષિણ આફ્રિકાને 3 વિકેટે હરાવી હતી.

હવે ઓસ્ટ્રેલિયન ટીમ 8મી વખત ફાઈનલ રમશે. અત્યાર સુધી તેણે 7માંથી સૌથી વધુ 5 વખત ટાઇટલ જીત્યા છે. તેને 1975માં વેસ્ટ ઈન્ડિઝ સામે અને 1996માં શ્રીલંકા સામે બે વખત હારનો સામનો કરવો પડ્યો હતો. જ્યારે ઓસ્ટ્રેલિયાએ 1987, 1999, 2003, 2007 અને 2015માં સૌથી વધુ 5 વખત ખિતાબ જીત્યો છે. તેણે 1999 થી 2007 સુધી સતત ત્રણ વખત આ ખિતાબ જીત્યો.

જ્યારે વર્લ્ડ કપમાં ભારતીય ટીમની આ ચોથી ટાઈટલ મેચ હશે. આ ટીમે 1983માં કપિલ દેવની કપ્તાનીમાં પ્રથમ વખત ખિતાબ જીત્યો હતો. આ પછી ભારતીય ટીમને 2003ની ફાઇનલમાં ઓસ્ટ્રેલિયાના હાથે હારનો સામનો કરવો પડ્યો હતો. પરંતુ 2011માં ભારતીય ટીમે તેનું બીજું ટાઈટલ જીત્યું હતું. ત્યારે મહેન્દ્ર સિંહ ધોની કમાન સંભાળી રહ્યો હતો.

Another record for Virat Kohli 👑

More #CWC23 stats ➡️ https://t.co/nLlLIqdPDT pic.twitter.com/5jGLfKfjX1

— ICC (@ICC) November 16, 2023

ઓસ્ટ્રેલિયા 7 વખત ફાઈનલ રમ્યું, 5 વખત જીત્યું

• 1975માં હાર્યા, વિ. વેસ્ટ ઈન્ડિઝ, લોર્ડ્સ
• 1987માં જીત્યા વિ. ઇંગ્લેન્ડ, ઇડન ગાર્ડન્સ
• 1996માં હાર્યા, વિ. શ્રીલંકા, લાહોર
• 1999માં જીત્યા, વિ. પાકિસ્તાન, લોર્ડ્સ
• 2003માં જીત્યા, વિ. ભારત, જોહાનિસબર્ગ
• 2007માં જીત્યા, વિ. શ્રીલંકા, બ્રિજટાઉન
• 2015માં જીત્યા, વિ. ન્યુઝીલેન્ડ, મેલબોર્ન

ભારતીય ટીમ 3 વખત ફાઈનલ રમી, 2 વખત જીતી

• 1983માં જીત્યા, વિ. વેસ્ટ ઈન્ડિઝ, લોર્ડ્સ
• 2003માં હાર્યા, વિ. ઓસ્ટ્રેલિયા, જોહાનિસબર્ગ
• 2011માં જીત્યા, વિ. શ્રીલંકા, વાનખેડે (મુંબઈ)

આ રીતે સમજી શકાય ભારતીય પ્લેયર્સની દાદાગીરી

આ વખતે, બંને સેમિ-ફાઇનલ મેચના અંત સુધી, ટૂર્નામેન્ટના ટોપ-5 સ્કોરરમાં ઓસ્ટ્રેલિયાનો કોઈ બેટ્સમેન નથી. જ્યારે આ યાદીમાં બે ભારતીય ખેલાડી વિરાટ કોહલી અને રોહિત શર્મા હાજર છે. વિરાટ કોહલી ટોપ પર છે. બોલિંગમાં પણ ભારતીયોની દાદાગીરી દેખાઈ રહી છે.

ટોપ-5 બોલરોની યાદી પર નજર કરીએ તો ભારતીય ફાસ્ટ બોલર મોહમ્મદ શમી ટોપ પર છે. જ્યારે અન્ય ભારતીય જસપ્રિત બુમરાહ 5માં નંબર પર છે. એટલે કે અહીં પણ બે બોલર ટોપ-5માં સામેલ છે. જ્યારે આ યાદીમાં માત્ર એક ઓસ્ટ્રેલિયન બોલર એડમ ઝમ્પા બીજા સ્થાને છે. એટલે કે બોલિંગ અને બેટિંગ બંનેમાં ભારતીયો ટોચ પર છે.